"زنــــزانـة رقم 17 "
***************
أنا مليت من الترحال
طلبت فى يوم أكون حرة
لاقتنى فى حضن 100 سجّان
و زنزانتى سكك فاضية
ماليها الزيف على أشكال
ساعات يجى ويضحكلك
تأمن ليه تقربله
تطول الخطوة وتعافر
ولا تمسك سراب ضلُه
ساعات يطلب رضا قلبك
تزيد فى الطيبه تسلمله
و دون أعذار أوام يرحل
ولا خدتش روحى منه
أكمل فى الطريق أملاً
بقول يمكن فى يوم يقصر
فألاقى السهم طوالى
يضيق سجنى عليا أكتر
تطول العتمة واتمنى
فى طاقة نور
يا زنزانة ضاقت بيا
ولا عارفة حتى اثور
ياريتك كنت مش سايب
هنا قلبك يفكرنى
مهما غاليت فى ترحالى
هتفضل بردو مستنى
أنا أسفه مش هرجع
واطلب منك تسامحنى
عشان كان فى حاجات بنا
مقبلتشى تموت طوعاً
فا سابت فيا جراح ياما
وفارقت بعد عذاب طبعاً
فا ياريت قلبك يفارقنى
ويسيب براح فى زنزانتى
ببساطة انا مش مكسورة
عشان استنى
تيجى انت تصلّحنى
ولو عالعتمة هملاها
ببستان ورد
ولو عالسجن هيجى اليوم
عشان يتهد
وهكمل بردو مشوارى وترحالى
وهفضل اعافر لو حتى
طريقى اتبدل بمليون سد
بقلم : د/آيه فاروق
حميلة جدا
ردحذفمش جديد يعنى الطألق دة
ردحذف(جـ مـ يـ لـ ـه)